બ્રહ્માજી નારદજીને કહે છે કે, આ સમયે બધા દેવતાઓ ભગવાન વિષ્ણુ અને મને આગળ રાખીને સતીની તપસ્યા જોવા ગયાં. ત્યાં જઈને તેમણે જોયું કે સતી જાણે મૂર્તિમતી સિદ્ધિ જ જણાતાં હતાં. તેઓ ભગવાન શિવના ધ્યાનમાં નિમગ્ન હતાં અને તે સમયે સિદ્ધાવસ્થાને પ્રાપ્ત થઈ ગયાં હતાં. બધા દેવતાઓએ ખૂબ પ્રસન્નતાપૂર્વક બંને હાથ જોડીને સતીને નમસ્કાર કર્યા. મુનિઓએ પણ માથાં નમાવ્યાં. શ્રીહરિ વગેરેના મનમાં પ્રીતિનાં પૂર ચઢી આવ્યાં. શ્રીવિષ્ણુ સહિત બધા દેવતાઓ અને મુનિઓ આશ્ચર્યચકિત થયા. તેઓ દેવીની તપસ્યાની ભારે પ્રશંસા કરવા લાગ્યાં. પછી તેમણે દેવીને પ્રણામ કર્યા. સતીને પ્રણામ કર્યા પછી દેવતાઓ અને મુનિઓ તરત જ ગિરિશ્રેષ્ઠ કૈલાસ પર્વત પર ગયા. એ પર્વત ભગવાન શિવને ખૂબ પ્રિય છે. બ્રહ્માજી સાવિત્રી સાથે અને ભગવાન વાસુદેવ લક્ષ્મી સાથે પ્રસન્નતાપૂર્વક મહાદેવજી પાસે ગયા. ત્યાં ભગવાન શિવને જોતાં જ બધા દેવતાઓએ બહુ વેગથી પ્રણામ કર્યા. પછી તેમણે બંને હાથ જોડીને વિવિધ પ્રકારનાં સ્તોત્રોથી ભગવાન શિવની સ્તુતિ આરંભી. અંતમાં તેમણે પ્રભુને આ પ્રમાણે કહ્યું.
0:00 / 0:00