اگر ایک رکشہ مین روڈ پر کیچڑ میں پھنسا ہو اور اسے نکالنے کے لیے پانچ آدمیوں کو دھکا لگانا

اگر ایک رکشہ مین روڈ پر کیچڑ میں پھنسا ہو اور اسے نکالنے کے لیے پانچ آدمیوں کو دھکا لگانا پڑے… تو سوچیں یہ سڑک ہے یا لوگوں کی آزمائش؟ ذرا یہ ویڈیو ضرور دیکھیں۔ السلام علیکم! یہ ویڈیو ہمارے علاقے زہرانیاں والا، تحصیل دریاخان کی مین روڈ کی موجودہ حالت دکھانے کے لیے بنائی جا رہی ہے۔ میں مؤدبانہ طور پر اس مسئلے کی طرف توجہ دلانا چاہتا ہوں۔ محترم اسسٹنٹ کمشنر دریاخان، محترم ڈپٹی کمشنر بھکر، ہائی ویز ڈیپارٹمنٹ (Highways Department) اور کمیونیکیشن اینڈ ورکس ڈیپارٹمنٹ (C&W)، آئی جی پنجاب، وزیر اعلیٰ پنجاب محترمہ مریم نواز شریف صاحبہ اور دیگر متعلقہ حکام سے ادب کے ساتھ گزارش ہے کہ اس صورتحال پر ایک نظر ضرور ڈالیں۔ یہ کوئی عام گلی نہیں بلکہ ہمارے علاقے کی مین روڈ ہے۔ جب بھی بارش ہوتی ہے تو یہ راستہ مکمل طور پر کیچڑ میں تبدیل ہو جاتا ہے۔ آج کی ویڈیو میں آپ دیکھ سکتے ہیں کہ ایک رکشہ اس کیچڑ میں بری طرح پھنسا ہوا ہے۔ ہمیں یہ بھی معلوم نہیں کہ اس میں بیٹھا ہوا مسافر کہاں سے آیا ہے یا اسے کہاں جانا ہے، مگر اس غریب آدمی کا کافی وقت یہاں ضائع ہو گیا ہے اور کئی لوگوں کو مل کر اسے دھکا لگا کر نکالنا پڑ رہا ہے۔ سوچنے کی بات یہ ہے کہ اگر اسی وقت کسی مریض کو ہسپتال لے جانا ہو، کسی بچے کو سکول جانا ہو یا کسی بزرگ کو گزرنا ہو تو وہ کیسے گزرے گا؟ یہ صورتحال واقعی اہلِ علاقہ کے لیے ایک بڑی مشکل بن چکی ہے۔ ہم اہلِ علاقہ پہلے بھی بارہا درخواست کر چکے ہیں اور اپنی طرف سے بھی بہت کوشش کی، مگر یہ مسئلہ مستقل طور پر حل نہیں ہو سکا۔ لہٰذا آپ تمام متعلقہ حکام سے انتہائی مودبانہ درخواست ہے کہ براہِ کرم اس مسئلے پر توجہ فرمائیں اور اس سڑک کی مستقل بنیادوں پر مرمت کروائیں تاکہ اہلِ علاقہ کو اس مشکل سے نجات مل سکے۔ اہلِ علاقہ کے نوجوانوں سے بھی درخواست ہے کہ اس ویڈیو کو زیادہ سے زیادہ آگے شیئر کریں تاکہ یہ آواز حکام تک پہنچ سکے اور ہمارے علاقے کے اس مسئلے کا حل ممکن ہو سکے۔ شکریہ کلیم اللہ خان اہلِ علاقہ، زہرانیاں والا تحصیل دریاخان، ضلع بھکر