Assalam o Alaikum, Main hoon Dr

Assalam o Alaikum, Main hoon Dr. Hina Saeed. Aaj hum baat karenge ek bohat common lekin serious bimari ke baare mein, jo hai “Sugar” yaani Diabetes. Aaj kal har dusre ghar mein koi na koi is bimari ka shikar hai, lekin afsos ki baat yeh hai ke log isay properly samajhtay nahi. Sab se pehle yeh samajhna zaroori hai ke sugar hoti kya hai. Diabetes ek aisi condition hai jahan aap ke khoon mein glucose yaani sugar ki miktar barh jati hai. Yeh is liye hota hai kyun ke ya to body insulin theek se nahi bana rahi hoti, ya insulin properly kaam nahi karta. Insulin ek hormone hai jo sugar ko control karta hai. Ab sawal yeh hai ke yeh zyada tar kis age mein hoti hai. Aksar logon ko lagta hai ke sugar sirf buzurgon ki bimari hai, lekin aaj kal yeh young logon mein bhi bohat tezi se barh rahi hai. Type 1 diabetes bachon mein bhi ho sakti hai, jab ke Type 2 diabetes zyada tar 35-40 saal ke baad hoti hai, lekin unhealthy lifestyle ki wajah se yeh ab 20s aur 30s mein bhi dekhne ko mil rahi hai. Agar aap sugar ke mareez hain to sab se zaroori baat yeh hai ke aap apne lifestyle ko change karein. Apne aap ko fit rakhne ke liye daily walk ya exercise zaroor karein, kam az kam 30 minutes. Meetha aur oily food kam karein, apni diet balanced rakhein, sabziyan, salad aur fiber zyada use karein. Pani zyada piyen aur apna weight control mein rakhein. Regular apni sugar check karwana bhi bohat zaroori hai.