Woh naam jo adhoora tha… kuch nishaniyan waqt se nahin toot'tin… sirf logon se bichha

Woh naam jo adhoora tha… kuch nishaniyan waqt se nahin toot'tin… sirf logon se bichhar jaati hain. Meeraal corridor mein saakit khari thi. Baarish ki nami fiza mein ghuli hui thi… aur Sahir ke haath mein pakra silver pendant halki roshni mein chamak raha tha. Us par sirf ek lafz ka toota hissa tha. …raal Meeraal ke andar jaise kisi ne band darwaza zor se khol diya ho. Us ne be-ikhtiyaar haath barhaya. "Yeh… kahan se mila?" Sahir ne pendant foran us ke haath mein nahin diya. "Mujhe nahin maloom." "Kya matlab?" "Yeh barson se mere paas hai." Us ki awaaz hamesha ki tarah dheemi thi… magar is baar us mein uljhan zyada thi. "Main ne kabhi ise phenka nahin… magar yaad bhi nahin ke yeh mere paas aaya kaise." Meeraal ne pendant thaam liya. Us ki ungliyan kaanp rahi thin… jaise woh dhaat nahin… apna maazi chhoo rahi ho. Ek lamhe ko us ki aankhon ke saamne sab dhundla gaya. Baarish… gaari ki headlight… kisi ka haath mazbooti se us ka haath pakre hue… aur phir ek zor daar awaaz. Woh larkhara gayi. Sahir ne foran us ka baazu thaam liya. "Meeraal!" Us ki saans be-tarteeb hone lagi. Gardan ke peeche thanda paseena ubhra. "Main… main…" "Saans lo." Sahir ki girift mazboot thi… magar lehja narm. Woh use corridor ki bench tak le aaya. Meeraal baith gayi… magar dil ab bhi daur raha tha. Chand lamhon baad Mehak wahan pohanchi. "Meeraal!" Woh foran us ke paas baithi. "Kya hua?" Meeraal jawab na de saki. Mehak ne Sahir ki taraf dekha. "Aap please paani le aayen." S